ஓய்வூதிய வழக்கில் கால அவகாசம் கோரிய தமிழ்நாடு அரசு: உயர்நீதிமன்ற மதுரை கிளை வழக்கை ஒத்திவைத்தது. ~ Kalvisolai

ஓய்வூதிய வழக்கில் தமிழ்நாடு அரசு கால அவகாசம் கோரியது.
உயர்நீதிமன்ற மதுரை கிளையில் காணொளி வாயிலாக அரசு தலைமை வழக்கறிஞர் ஆஜரானார்.
CPS ஒழிப்பு இயக்க மாநில ஒருங்கிணைப்பாளர் பிரெடெரிக் எங்கெல்ஸ் தொடர்ந்த வழக்கு நீதியரசர்கள் G.R. சுவாமிநாதன், R. கலைமதி அமர்வில் இன்று (17.12.2025) விசாரணைக்கு வந்தது.
புதிய ஓய்வூதியத் திட்டம் குறித்து மனுதாரரின் கேள்விகளுக்கு தமிழக அரசின் சார்பில் எழுத்துப்பூர்வமாகப் பதில் வழங்கப்பட்டது.
மனுதாரர் தரப்பு வாதம்:
- இந்தியாவில் முதல் மாநிலமாகத் தமிழ்நாட்டில் புதிய ஓய்வூதியத் திட்டம் நடைமுறைப்படுத்தப்பட்டது.
- ஊழியரின் ஊதியத்தில் 10% பிடித்தம் செய்யப்பட்டு, அரசின் பங்களிப்பாக 10% வழங்கப்பட்டு, பணி ஓய்வின்போது ஒட்டுமொத்தமாக வழங்கப்படுகிறது.
- PFRDA-ல் அனைத்து மாநிலங்களும் புரிந்துணர்வு ஒப்பந்தம் செய்யப்பட்டு ஓய்வூதியத் தொகை அதன் பராமரிப்பில் உள்ளது.
- பல மாநிலங்களில் புதிய ஓய்வூதியத் திட்டம் ரத்து செய்யப்பட்டு பழைய திட்டம் கொண்டுவரப்பட்டுள்ளது.
- தமிழ்நாட்டில் CPS திட்டத்தில் ஓய்வூதியம் வழங்கப்படவில்லை, பணிக்கொடையும் இல்லை, விதிமுறைகளும் உருவாக்கப்படவில்லை.
- பல மாநிலங்கள் அரசின் பங்களிப்பாக 14% உயர்த்தி வழங்கி வருகின்றனர்.
- 1978 ஓய்வூதிய விதிகளின்படி பழைய திட்டத்தில் பணிக்கொடை, ஓய்வூதியம், குடும்ப ஓய்வூதியம் வழங்கப்படுகிறது.
- தேர்தல் வாக்குறுதியில் புதிய ஓய்வூதியத் திட்டத்தை ரத்து செய்வதும் ஒன்று.
- 2019 ஜாக்டோ ஜியோ போராட்டத்தின்போது நீதியரசர் கே. கே. சசிதரன் அமர்வில் தமிழக அரசால் வழங்கப்பட்ட ஓய்வூதிய அறிக்கை இதுவரை என்ன ஆனது என்று தெரியவில்லை, பழைய திட்டம் ஊழியர்களுக்குப் பாதுகாப்பானது.
அரசு வழக்கறிஞர் மற்றும் தலைமை வழக்கறிஞர் தரப்பு வாதம்:
- 01.04.2003 முதல் புதிய ஓய்வூதியத் திட்டம் தமிழ்நாட்டில் அமலில் உள்ளது.
- மனுதாரர் 2005-ல் பணியில் சேர்ந்துள்ளார், 2012-ல் வழக்கு தொடர்ந்துள்ளார்.
- அரசாணை எண்கள்: 430, 59-ன்படி புதிய ஓய்வூதியத் திட்டத்தில் ஓய்வூதியத்தை வரையறை செய்துள்ளோம்.
- நீதியரசர் சிவஞானம் அமர்வு வழங்கிய தீர்ப்பின் அடிப்படையில் இவ்வழக்கினைத் தள்ளுபடி செய்ய வேண்டும்.
- மனுதாரர் தமிழில் வினாக்கள் கொடுத்ததால் நாங்களும் தமிழில் பதில் வழங்கியுள்ளோம்.
- இது பற்றி தெரிவிக்க கால அவகாசம் கோரினார்.
நீதியரசர்கள் அரசிற்கு கால அவகாசம் வழங்கி 06.01.2026 அன்றைக்கு வழக்கை ஒத்திவைத்தனர்.